افغان پُست د هوایي دهلیزونو له لارې خپل خدمتونه پيلوي!
افغان پُست شرکت د هوایي دهلیزونو له لارې د اسانتیا برابریدو په موخه له صنعت او سوداګرۍ وزارت، ملکي هوایي چلند ادارې او افغانستان د سوداګرۍ او پانګونې خونې د هوکړه لیکونو د لاسلیک په اړه د همغږۍ غونډه وکړه.
د ولسمشرۍ ماڼۍ د چارو ادارې اړوند د جمهوري ریاست عالي شوراګانو د انسجام ریاست له خوا په دغه جوړه شوې غونډه کې، له خونو فدراسیون سره هم د یاد هوکړه لیک د لاسلیک پریکړه او د ګډ هوکړه لیک په اړه هراړخیز بحثونه وشول.
په پای کې پریکړه وشوه، چې افغان پُسټ به د خونو فدراسیون سره د همغږۍ بله غونډه ترسره او یاد فدراسیون به د هوکړه لیک پينځم لوری وي.
په پام کې ده، چې یاد هوکړه لیک به د جلالتماب جمهور رئیس په حضور کې د اقتصاد عالي شورا د راتلونکې غونډې پرمهال لاسلیک شي.
