ښاغلي احمد وحید ویس، د قیمتي او نیمه قیمتي تیږو د صادروونکو ټولنې له رییس سره وکتل.
د افغان پُست شرکت لوی رییس ښاغلي احمد وحید ویس، د دوه اړخیزو همکاریو پراختیا په موخه د قیمتي او نیمه قیمتي تیږو د صادروونکو ټولنې له عامل رییس ښاغلي نصیب عزیز بیګ سره وکتل.
په دغه کتنه کې ښاغلي ویس ژمنه وکړه، چې د صادراتو په برخه کې، له اړوندو بنسټونو سره د همغږۍ او اصولو په رڼا کې د هېواد د درونو سوداګرو هر اړخیز ملاتړ ته ژمن دی.
په ناسته کې ښاغلي بېګ وویل، د قیمتي غمیو د صادراتو له لارې په کال کې درې ملیارده عواید یوازې ملي خزانې ته راټولېدای شي او زیاته یې کړه، «بدبختانه اوسمهال د هېواد قیمتي تیږي د قاچاق له لارې نورو ګاونډیو هېوادونو ته انتقاليږي، چې د عوایدو تر څنګ د دې تیږو د مالکیت ویاړ هم همدې هېوادونو ته ځي.»
د ناستې په پای کې ښاغلي ویس، د موضوع د تخنیکي اړخونو له ارزولو وروسته له اړوندو بنسټونو (د مالیې وزارت له ګمرکاتو او معدنونو وزارت) سره د همغږۍ پر اساس د څلور اړخیزې هوکړې پر لاسلیکولو ټینګار وکړ.
