ښاغلي احمد وحید ویس، د ښار جوړونې وزارت د ځمکو چارو له معین سره وکتل!
د افغان پُست شرکت لوی رییس، ښاغلي احمد وحید ویس او د دغه شرکت تخنیکي او عملیاتي مرستیال ښاغلي عبدالهادي ذهین د دوه اړخیزو همکاریو پراختیا په موخه، د ښار جوړونې وزارت د ځمکو چارو له معین، ښاغلي محمد بابر امیني سره وکتل.
په دغه کتنه کې ښاغلي ویس، د افغان پُست شرکت د ورستیو پرمختګونو او تازه پلانونو سربېره، د پوسټل کوډ پروژې پلې کولو په موخه، د ادرس موندنې په برخه کې د دغه وزارت ملاتړ وغوښت.
ښاغلي ویس همدا راز زیاته کړه، چې د نړیوالو معیارونو پر اساس پلان لري، د ګرځنده پُست خونو تر څنګ، د ښار په هره ګڼ مېشته سیمه کې، د سل زره کسانو له پاره یوه پُست خونه جوړه کړي او د دې پُست خونو د جایدادونو په برخه کې یې د ښار جوړونې وزارت همکاري اړینه وبلله.
په دغه کتنه کې ښاغلي ذهین، هېوادوالو ته د پُستي او نورو عامه خدمتونو وړاندې کولو په برخه کې د افغان پُست شرکت له خوا تازه جوړو شویو سیسټمونو پر اهمیت او تخنیکي ارزښتونو بحث وکړ.
په ناسته کې ښاغلي امیني، د افغان پُست شرکت وروستی چټک پرمختګ او تر لاس لاندې کارونه، په افغانستان کې بې مخېینې وبلل او د یوې دوه اړخیزې هوکړې پر اساس یې له دغه شرکت سره د هر اړخیز ملاتړ ژمنه وکړه.
په پای کې دواړو لوریو، د افغان پست له اداري څانګو او مرکزي پست خونې لیدنه وکړه.
