د افغان پُست امارتي شرکت او د پاسپورټ لوی ریاست ترمنځ نوی هوکړه لیک لاسلیک شو!
د افغان پُست امارتي شرکت او د پاسپورټ لوی ریاست ترمنځ د یوې پرتمینې غونډې په ترڅ کې یو نوی هوکړه لیک لاسلیک شو، چې له مخې به یې پاسپورټونه د متقاضیانو کورونو ته لېږدول کېږي. دغه مراسم د افغان پُست امارتي شرکت په مقر کې ترسره شو، چې د دواړو ادارو لوړ پوړو چارواکو پکې ګډون درلود.
د غونډې په پیل کې، الحاج مولوي رحمتالله مکي، د افغان پُست امارتي شرکت لوی رئیس، د پاسپورټ لوی ریاست پلاوي ته ښه راغلاست ووایه او د یادې ادارې د زحمتونو او هر اړخیزو همکاریو ستاینه یې وکړه. نوموړي د هوکړه لیک د موخو د تحقق پر څرنګوالي هر اړخیزه وینا وکړه او ژمنه یې وکړه، چې افغان پُست امارتي شرکت به دغه مسؤولیت په سم او دقیق ډول ترسره کړي.
ورپسې، الحاج مولوي عبدالکریم حسیب، د پاسپورټ لوی ریاست رئیس، د افغان پُست شرکت له مسوولینو څخه د هغوی د هڅو او لاسته راوړنو مننه وکړه. نوموړي د دې نوې اسانتیا له امله خوښي وښوده، چې متقاضیان به وکولی شي خپل پاسپورټونه په خپل کور کې ترلاسه کړي، او ډاډ یې ورکړ چې د پاسپورټ لوی ریاست به په دې برخه کې د افغان پُست امارتي شرکت سره هر اړخیزې همکارۍ ته دوام ورکړي.
