د افغان پُست حقوقي حیثیت د څرنګوالي په تړاو، د چارو اداري ناسته!
د افغان پُست شرکت په تړاو، د ولسمشر محمد اشرف غني د ۲۸۲۸ حکم او له ریاست څخه شرکت ته د دغې ادارې حقوقي حیثیت د څرنګوالې په موخه د چارو ادارې عمومي ریاست د انسجام مرستیال ډاکټر عبدالکریم توتاخېل په مشرئ له اړوندو بنسټونو سره ناسته تر سره شوه.
په دغه ناسته کې د چارو ادارې مرستیال وویل: «د افغانستان اسلامي جمهوریت د حکم پلې کولو په موخه د مخابراتو، مالیې او عدلیې وزارتونه مکلف دي، څو د اساسنامې بشپړولو د څرنګوالي او افغان پُست ته د ملکیتونو په لېږد کې چټک، جدي او هر اړخیز ګامونه اوچت کړي.»
په ناسته کې د څار (تفتیش) ادارې او د ماليې، مخابراتو او عدلیې وزارتونو استازو، د افغان پُست له لوري د منقولو او غیر منقولو ملکیتونو په اړه د جوړ شوي راپور په تړاو نظریاتو تر څنګ، د دغې پروسې د چټکتیا په موخه د هر اړخیزو همکاریو ژمنه وکړه.
