د هيواد له مالیې وزیر سره د ښاغلي احمد وحید ویس لیدنه!
د افغان پُست شرکت لوی رئیس ښاغلي احمد وحید ویس، د هېواد له مالیې وزیر ښاغلي عبدالهادي ارغندیوال سره وکتل. په دغه کتنه کې ښاغلي ویس د افغان پُست شرکت تازه ودې، پرمختګونو، عوایدو او وروستیو لاسته راوړنو سربېره، د دغه شرکت د راتلونکو پلانونو او تګلارو په اړه معلومات شریک کړل. همدا راز ښاغلي ویس د افغان پُست شرکت حقوقي حیثیت په اړه، د افغانستان اسلامي جمهوریت (۲۸۲۸) حکم پلې کېدو په اړه مالومات وړاندې کړل.
ښاغلي ارغندیوال د افغان پُست شرکت له وروستیو پرمختګونو او تازه تګلارو څخه د ملاتړ ترڅنګ زیاته کړه، چې دغه شرکت د هېواد په کچه د مخکښو دولتي شرکتونو په کتار کې راځي. ښاغلي ارغندیوال، د افغان پُست شرکت وده او پرمختګ، د ملي عوایدو د پراختیا په برخه کې خورا مهم وباله او د دغه شرکت د حقوقي حیثیت لوړېدو په برخه کې یې د جمهوري ریاست له حکم څخه خپل هر اړخیز ملاتړ اعلان کړ.
