د 1403 هـ ل کال، جوزا میاشتي 7 مه نېټه، کابل کې د افغان پُست امارتي شرکت ادارې ناسته:
یاده ناسته، د افغان پُست امارتي شرکت د لوی رئیس ښاغلي الحاج مولوی رحمت الله مکی په مشرۍ او د شرکت د مرستیالانو، څانګو رئیسانو او آمرینو په ګډون تر سره شوه.
په یاده ناسته کې د شرکت په یو لړ مهمو مسايلو لکه د بهرنیو هیوادونو سره د پُستي اړیکو دلا ټینګښت، د بین المللي صدوري کڅوړو/ پُستو د انتقال په برخه کې د شته ستونزو د حل په موخه په دوبۍ کې د افغان پُست نمایندګۍ فعالولو، په غوره او معیارې ډول د پُستي خدمتونو وړاندې کولو او پیرېدونکو ته د اسانتیاوو برابرولو په موخه په سپېنو ساحو کې د نویو پُست خونو جوړولو او د افغان پُست د شته پُست خونو د دویمو پوړونو ودانولو، د پُستي خدمتونو په ځانګړي توګه د کارګو خدمتونو وړاندې کولو په موخه د شهر نو سېمه کې د نماینده ګۍ فعالولو، د مالي او اداري څانګو کارکوونکو ته د کویک بوک سیستم پیرلو او د افغان پُست مستحقو کارکوونکو ته د اضافه کارۍ حواله کولو پر موضوعاتو هر اړخېز بحث تر سره شو او په اړه يې اړېن تصامیم اتخاذ شول.
د ناستې په پای کې ښاغلی مکي د ناستې ګډونوالو ته په چارو کې د بریالیتوبونو هيله څرګنده کړه او د چارو د ښه تنظیم په موخه ئې اړېني لارښووني او سپارښتني وړاندې کړي.
