د (تیتسو ناکامورا بشرپاله چوپړونو په ویاړ) پُستي ټکټ د پرانیستې غونډه!
د افغان پُست شرکت له خوا (د تیتسو ناکامورا بشرپاله چوپړونو په ویاړ) چاپ شوی پُستي ټکټ، د ارګ په چهار چنار ماڼۍ کې د چارو ادارې لوی رئیس ښاغلي فضل محمود فضلي، د افغان پُست شرکت لوی رئیس ښاغلي احمد وحید ویس، په کابل کې د جاپان سفارت شازدافیر او نورو لوړپوړو چارواکو په ګډون د یو لړ مراسمو په ترڅ کې پرانیستل شو.
په دغو مراسمو کې ښاغلي ویس، ناکامورا د افغانستان پېژندګلوي یوه مهمه برخه یاد کړ او د هغه لاسته راوړنې یې د افغانانو له پاره مثال وباله.
ښاغلي فضلي هم د ډاکټر ناکامورا له لاسته راوړنو څخه د ستاینې تر څنګ، د افغان پُست شرکت له خوا، د دغه پُستي ټکټ چاپول اغېزناک ګام وباله او دا چاره یې د افغانستان په تاریخ کې د ناکامورا فعالیتونو ته د تل پاتې یادګار پاتې کېدلو له پاره اړینه یاده کړه.
په مراسمو کې د جاپان هېواد شازدافیر خپله وینا د تیتسو ناکامورا پر فعالیتونو، د اوبو مدیریت او دا چې څه ډول یې د جاپان دودیزو لارو چارو پر مټ وکولای شول زرګونه جریبه شاړه ځمکه اباده کړي راټوله کړه.
د ناکامورا پُستي ټکټ له پرانیستې وروسته، د غونډې په پای کې راغلو مېلمنو د افغان پُست شرکت له خوا د پُستي ټکټونو له نندارتون څخه هم لیدنه وکړه.
د یادونې وړ ده، چې د تیتسوناکامورا د بشرپاله خدمتونو په ویاړ (پنځوس زره) پُستي ټکټونه چاپ شول او د هر ټکټ بیه ۳۰۰ افغانۍ ټاکل شوې ده.
