د جدی میاشتي 23 مه نېټه، کابل کې د افغان پُست دولتي شرکت ادارې ناسته تر سره شوه!
یاده ناسته، د افغان پُست دولتي شرکت د لوی رئیس ښاغلي الحاج مولوی رحمت الله مکی په مشرۍ او د شرکت د مرستیالانو، څانګو رئیسانو او آمرینو په ګډون تر سره شوه.
په دغه ناسته کې د شرکت په یو لړ مهمو فعالیتونو لکه د پُستي کڅوړو د معیاري کتنې (چک) په موخه د مشترک میز را منځته کولو، د اقتصادي کمیسیون د پرېکړې په اساس په ترانزیټي وسایطو کې د GPS آلي نصبولو، د ۶ نویو ایجاد شویو پُست خونو لپاره د انترنټي اسانتیاوو برابرولو، د کار آموزانو لپاره د کارې زده کړو په برخه کې د اسانیتاوو برابرولو او د ریاستونو له لورې د پیل شویو قراردادونو د بشپړولو پر موضوعاتو هر اړخیز بحث تر سره شو او په اړه یې اړېن تصامیم و نېول شول.
د ناستې په پای کې ښاغلی مکي د ناستې ګډونوالو ته په چارو کې د بریالیتوبونو هيله څرګنده کړه او د چارو د ښه تنظیم په موخه ئې اړېني لارښووني او سپارښتني وړاندې کړي.
