د هیواد لومړي مېرمن د ښځو د نړیوالې ورځ په مناسبت پُستي ټکټ پرانیست
د هیواد لومړۍ مېرمن رولا (بي بي ګل) غني د ښځو نړیوالې ورځې په مناسبت د پُستي ټکټ پرانیستې په مراسمو کې چې په ارګ کې جوړ شوي وو، ګډون او وینا وکړه.
د دغو مراسمو په پیل کې د افغان پُست دولتي شرکت رئیس احمد وحید ویس وویل، اوس پُستي خدمتونه طلایي دورې ته داخل شوي دي. په دې دوره کې د جمهوررئیس د پاملرنې پر بنسټ د پُستي خدمتونو پرمختګ یو ځل بیا غوړېدلی چې د بین المللي معیارونو مطابق د پُستي خدمتونو پراختیا، دیجیتلي او عصري کول په کې شاملېږي.
هغه زیاته کړه، د انکشاف او بین المللي ملاکونو مطابق د پُستي خدمتونو عرضه او په هیواد کې د پُستي خدمتونو وړاندې کولو په برخه کې د سالمې سیالۍ فضا د ایجاد په خاطر، د افغان پُست ریاست د جمهوررئیس د حکم پر بنسټ د مخابراتو وزارت پر افغان پُست دولتي شرکت حقوقي شخصیت بدل شوی دی.
د افغان پُست رئیس د هیواد د ښځو د ملاتړ په برخه کې د دغه بنسټ د اقداماتو په اړه وویل، د ښځو د اقتصادي وضعیت د ودې لپاره د افغان پُست شرکت د شپږو میاشتو راپدېخوا په ملي او بین المللي سطحه د سوداګریزو سمپلونو او مراسلاتي بستو د لېږد په برخه کې د افغان ښځو سوداګرۍ خونې سره همکاري کوي.
نوموړي همداراز د متشبثو ښځو د ملاتړ او بازار موندنې، اشتغال زایي، خوندي کاري فضا د ایجاد، د ښځو د پیاوړتیا، دوی ته د روزنیزو برنامو جوړولو او کاري زده کړې فرصت د ایجاد، یوې مېرمنې ته د برېښنایي سوداګرۍ خدمتونو د مدیریت او رهبرۍ سپارلو، د ښځو له لورې د پېرېدونکو خدمتونو رهبري او ښځو ته د افغان پُست له ۳۰ نه تر ۴۰ سلنې پورې بستونو د مختص کېدو په اړه معلومات ورکړل.
وروسته د هیواد لومړۍ مېرمن د ښځو د نړیوالې ورځې د مبارکۍ ترڅنګ وویل، د خوښۍ ځای دی چې افغان پُست د ښځو نړیوالې ورځې تر نامه لاندې د نوي پُستي ټکټ په نشرولو سره، د دې ورځې ارزښت څو برابره کړ. دغه پُستي ټکټ زموږ په ګران هیواد افغانستان کې د قومي تنوع، ښکارندویي کوي.
هغې زیاته کړه: د افغان پُست مننه او قدردانی کوو چې د دغه پُستي ټکټ په نشرولو سره نړۍ ته د افغان ټولنې مثبت تصویر وړاندې کوي.
د هیواد لومړۍ مېرمن څرګنده کړه، د افغان پُست خدمتونه نه یواځې د هیواد په داخل کې د افغان کورنیو او له هیواد بهر افغانانو ترمنځ د اتصال وسیله ده، بلکې د دې لامل شوي چې د نړۍ له نورو هیوادونو سره هم په اړیکه کې اوسي.
د دغو مراسمو په پای کې د هیواد لومړۍ مېرمن رولا (بي بي ګل) غني او د افغان پُست دولتي شرکت رئیس احمد وحید ویس، د ښځو ورځې پُستي ټکټ رسما پرانیست.
