ښاغلي احمد وحید ویس، د فیروزکوه موسسې د غالیو برخې له آمر سره وکتل!
د افغان پُست شرکت لوی رییس ښاغلي احمد وحید ویس او د دغه شرکت اداري او تجارتي مرستیال، د دوه اړخیزو همکاریو پراختیا او نړیوالو هېوادونو ته د وطني غالیو د لېږد په برخو کې د اسانتیاوو برابرولو په موخه، د فېروزکوه موسسې د غالیو برخې له آمر ښاغلي یما نوري سره وکتل
په دغه کتنه کې ښاغلي ویس ټینګار وکړ، چې افغان پُست د ټولو ملي سوداګرو او خصوصي شرکتونو ګډ کور دی او په وینا یې، دغه شرکت د سوداګریزو توکو او بېلګو د لېږد په برخو کې د ټولو سوداګرو په خدمت کي دی.
په ناسته کې ښاغلي نوري وویل، د سوداګرۍ او په مخکښو نړیوالو نندارتونونو کې د ګډون په موخه، هر کال د ۳ میلیونه ډالرو په ارزښت، شاوخوا ۱۶ زره کیلو غالۍ امریکا او نورو اروپايي هېوادونو ته د لېږد له پاره لري.
د ناستې په پای کې دواړو لوریو ژر تر ژره په دې برخه کې د دوه اړخیزو همکاریو د هوکړې پر لاسلیکولو ټینګار وکړ.
