له افغان بیسیم شرکت سره د دوه اړخیزو همکاریو هوکړه لاسلیک شوه
د افغان پُست شرکت لوی رییس ښاغلي احمد وحید ویس، له افغان بیسیم شرکت سره د دوه اړخیزو همکاریو پراختیا په موخه د دغه شرکت له رییس ښاغلي علی الله سروری او ورسره اداري پلاوي سره وکتل.
په دغه کتنه کې، دواړو لوریو د ازاد بازار او پېرودونکو د غوښتنو پر اساس، د متقابلو همکاریو پر وده او پراختیا ټینګار وکړ.
د ناستې په ترڅ کې، افغان پست شرکت ته د بازار موندنې، مخابراتي او انټرنیټي اسانتیاوو او برعکس افغان بیسیم شرکت ته په ملي او نړیواله کچه د پستي اسانتیاوو برابرولو په موخه د دوه اړخیزو همکاریو هوکړه لاسلیک شوه.
په دغه کتنه کې ښاغلي سروري وویل، د ویاړ ځای دی، چې د ملي ارزښتونو په پام کې نیولو سره له یوه ملي شرکت سره یو ځای کار کوو او د دغې هوکړې پر اساس چمتو یو څو افغان پُست شرکت د خپلو چارو د چټکتیا په موخه، د افغان بیسیم له پرمختللې ټکنالوژۍ څخه ګټه پورته کړي.
د کتنې په پای کې، د افغان بیسیم شرکت رییس د ښاغلي ویس په ملتیا، د دغه شرکت له مرکزي پُست خونې او تازه جوړو شویو اداري څانګو څخه هم کتنه وکړه.
