د اریانا افغان هوایي شرکت له سرپرست رییس سره د ښاغلي احمد وحید ویس لیدنه
د افغان پُست شرکت لوی رییس ښاغلي احمد وحید ویس، د کارګو لېږد په برخه کې دوه اړخیزو همکاریو پراختیا په موخه، د آریانا افغان هوايي شرکت له سرپرست رییس ښاغلي سلیم رحیمي سره وکتل.
په دغه کتنه کې ښاغلي ویس وویل، افغان پُست شرکت د هېواد اقتصادي شورا د پرېکړې پر اساس د هېواد د ننه دولتي اموالو او نړیوالو هېوادونو ته د سوداګریزو توکو د لېږد په برخه کې د ورسپارل شوي مسوولیت پر اساس لېوالتیا لري، چې د اریانا افغان هوايي شرکت په مرسته د کارګو لېږد په برخه کې شته ستونزو ته د پای ټکی کیږدي.
په ناسته کې، ښاغلي رحیمي اسیايي هېوادونو ته د کارګو لېږد په برخه کې، د آریانا شرکت پرکاري مخېینه او لاسته راوړنو د بحث تر څنګ، له هېواد څخه بهر د کارګو لېږد په برخه کې له افغان پُست شرکت سره د یوه مشترک بزنس پلان او دوه اړخیزې هوکړې پر لرلو ټینګار وکړ.
