افغان پُست شرکت، د تخینکي او مسلکي تعلیماتو له ادارې سره د دوه اړخیزو همکاریو هوکړه لاسلیک کړه.
د دغې هوکړې له مخې به افغان پُست شرکت، د تخنیکي او مسلکي تعلیماتو ادارې له مؤسسو څخه فارغو شویو محصلینو ته د کار زده کړې فرصتونه او یاده اداره به د افغان پُست شرکت کارکوونکو ته لنډمهاله ښوونیز کورسونه برابروي.
د افغان پُست شرکت تخنیکي او عملیاتي مرستیال ښاغلي عبدالهادي ذهین، د کار زده کړې دا ډول فرصتونه د وخت اړتیا وبلله او زیاته یې کړه، چې د دې هوکړې اساسي موخه د محصلینو او افغان پُست شرکت کارکوونکو د کاري ظرفیتونو لوړول دي.
په ناسته کې د تخنیکي او مسلکي تعلیماتو ادارې اکاډمیک مرستیال عبدالحمید اکبر زیاته کړه، چې له افغان پُست شرکت سره د تازه هوکړې له مخې به د تخنیکي او مسلکي زده کړو محصلین د کار زده کړې یو بل طلايي چانس تر لاسه کړي او باید پوره ګټه ترې پورته کړي.
