د افغان پُست امارتي شرکت او د عامې روغتیا وزارت د خوړو او درملو معینیت ترمنځ د دوه اړخیزو همکاریو هوکړه لیک لاسلیک شو!
دغه هوکړه لیک د دواړو ادارو ترمنځ د خدمتونو د لا اغېزمنتیا، چټکتیا او شفافیـت د رامنځته کولو په موخه لاسلیک شوی، چې له مخې به یې د عامې روغتیا وزارت له ولایتي ریاستونو څخه تر مرکزي لابراتوار پورې د غذايي موادو، درملو او نورو روغتیايي محصولاتو د نمونو (سَمپلونو) خوندي، دقیـق او باوري انتقال یقیني کړي. افغان پُست به د خپلې پراخې پُستي شبکې له لارې یادې نمونې د اړوندو معیارونو په نظر کې نیولو سره انتقالوي، څو د عامې روغتیا وزارت لابراتوارونو ته د رسېدونکو سَمپلونو خوندیتوب، تمامیـت او تخنیکي اعتبار په بشپړ ډول وساتل شي. مسوولین وايي چې دا نوښت به د کیفیت د څارنې بهیر چټک، شفاف او مؤثر کړي، او د هېواد د روغتیايي خدمتونو په ښه والي کې به مهم رول ولوبوي.
