د افغان پوسټ شرکت او احصایې ملي ادارې تر منځ د همغږۍ ناسته!
د افغان پوسټ شرکت لوی رییس ښاغلي انجنیر حامد ناصري، د افغان پوسټ شرکت له خوا د د برېښنايي پېژندپاڼو د وېش په برخه کې، د دوه اړخیزو همکاریو پراختیا او همغږۍ په موخه د احصايې ملي ادارې د انسجام له رییس ښاغلي فواد احمدي او ورسره پلاوي سره وکتل.
په دغه کتنه کي، ښاغلي ناصري، هېوادوالو ته د افغان پوسټ شرکت له لارې د برېښنايي پېژندپاڼو د وېش لړي پر بیا پیلېدو د ټینګار تر څنګ زیاته کړه، شرایطو ته په کتو باید د عامه خدمتونو وړاندې کولو لګښتونه راکم شي.
د ښاغلي ناصري په وینا، هېوادوالو ته په کمه بیه او بشپړه روڼتیا د عامه خدمتونو وړاندې کول، د افغانستان اسلامي امارت له لومړیتوبونو څخه دي او لازمه نه ده په دې برخه کې د تېرو ناخوالو په یادولو وخت ضایع شي.
په ناسته کې ښاغلي احمدي، هېوادوالو ته د افغان پوسټ شرکت له لارې د پېژندپاڼو د لېږد بیا پیلېدو او په خپل وخت د غو پېژندپاڼو رسولو پر موضوعاتو د ټینګار تر څنګ زیاته کړه، چې په دې برخه کې د لا ښه پرمختګ په موخه اړینه ده، په اړوندو ادارو کې د رهبرۍ په کچه همغږي رامنځته شي.
